Каляда на дуб

21 студзеня калектыў Каўбчанскага сельскага клуба разам з аматарскім этнаграфічным аб’яднаннем ”Вераценца” і творчымі работнікамі РДК “цягнулі” каляду на дуб. 

Абрад прайшоў так, як і ў ранейшыя часы, аднаўляючы атмасферу мінулага. Была выкуплена хата для гулянкі, упрыгожана барана, намаляваны конь на дзвярах крэйдай – сімвал таго, што каляда вернецца і ў наступным годзе. Цягнулі па вуліцы на санках "бабку" з куццёй, суправаджаючы шэсце песнямі і танцамі, спяваючы калядныя песні з традыцыйнымі словамі: "Ай, Калядачкі, а на дуб, на дуб…". 

Пасля гэтага ў сельскім клубе працягнуліся ўрачыстасці з выкананнем мясцовых песень і традыцыйных танцаў. Абрад "цягнуць Каляду на дуб" у Коўбчы – гэта не проста падзея, а сімвал таго, што традыцыі могуць стаць жывым пульсам вёскі. Калі такія ініцыятывы будуць падтрымлівацца, калі людзі будуць бачыць у іх не толькі мінулае, але і будучыню, то вёскі змогуць не толькі захаваць сваё насельніцтва, але і адрадзіцца, напоўніўшыся новым жыццём, заснаваным на глыбокай павазе да сваіх каранёў. Гэта шлях да моцных, жывых і прывабных для жыцця вёсак, дзе кожны адчувае сябе часткай вялікай і багатай гісторыі.